ഗാല്‍വന്‍ താഴ്‌വരയില്‍ ചൈനീസ് പതാക ഉയര്‍ത്തിയതായി കാണിക്കുന്ന വീഡിയോ ഔദ്യോഗിക ചൈനീസ് മാധ്യമം ട്വിറ്ററിലൂടെ പുറത്തുവിട്ടു. എന്നാല്‍ ചൈനയുടെ പതാക ഉയര്‍ത്തല്‍ പ്രദേശത്ത് ഇന്ത്യയും ചൈനയും തമ്മിലുള്ള സൈനികരഹിത മേഖല എന്ന കരാറിനെ ലംഘിക്കുന്നില്ലെന്ന് ഇന്ത്യന്‍ സൈനിക വൃത്തങ്ങള്‍ പറഞ്ഞു.
തര്‍ക്കമില്ലാത്ത ചൈനീസ് അധീനതയിലുള്ള പ്രദേശങ്ങളിലാണ് പതാക ഉയര്‍ത്തിയിരിക്കുന്നത് എന്നാണ് സൈനിക വൃത്തങ്ങള്‍ പറയുന്നത്. പതാക ഉയര്‍ന്നിരിക്കുന്നത് 2020 ജൂണില്‍ ഇന്ത്യയുടെയും ചൈനയുടെയും സൈനികര്‍ തമ്മില്‍ ഏറ്റുമുട്ടിയ നദിക്ക് സമീപമല്ല.
2022ലെ പുതുവത്സര ദിനത്തില്‍ ഗാല്‍വന്‍ താഴ്‌വരയില്‍ ചൈനയുടെ ദേശീയ പതാക ഉയരുന്നു എന്ന് വീഡിയോയിലും ട്വീറ്റിലും പറയുന്നു. ഈ പതാകയ്ക്ക് ഒരു പ്രത്യേകതയുണ്ടെന്നും ഇത് ഒരിക്കല്‍ ബീജിംഗിലെ ടിയാനന്‍മെന്‍ സ്‌ക്വയറിനു മുകളില്‍ ഉയര്‍ത്തിയ പതാകയാണെന്നും ട്വീറ്റില്‍ അവകാശപ്പെടുന്നു.
കഴിഞ്ഞ വര്‍ഷം ജൂലൈയില്‍ ഇന്ത്യയും ചൈനയും ഏറ്റുമുട്ടല്‍ നടന്ന സ്ഥലത്ത് നിന്ന് 2 കിലോമീറ്റര്‍ പരസ്പരം പിന്‍വലിക്കാന്‍ സമ്മതിച്ചിരുന്നു. ദേശീയ സുരക്ഷാ ഉപദേഷ്ടാവ് അജിത് ഡോവലും ചൈനയുടെ വിദേശകാര്യ മന്ത്രി വാങ് യിയും തമ്മില്‍ നടത്തിയ ചര്‍ച്ചയെ തുടര്‍ന്നാണിത്.
ഗാല്‍വാന്‍ ഏറ്റുമുട്ടല്‍ സ്ഥലത്ത് ഇരുവശത്തു നിന്നും 2 കിലോമീറ്റര്‍ അകലത്തില്‍ ഇന്ത്യയും ചൈനയും സൈനികരെ പിരിച്ചുവിട്ടതായി കഴിഞ്ഞ വര്‍ഷം ജൂലൈ മുതല്‍ ഉള്ള ഉപഗ്രഹ ചിത്രങ്ങള്‍ സ്ഥിരീകരിച്ചു. അജിത് ഡോവലും വാങ് യിയും തമ്മിലുള്ള പ്രത്യേക പ്രതിനിധിതല ചര്‍ച്ചകള്‍ക്ക് ശേഷമാണ് ഇത് നടന്നത്.
വേര്‍പിരിയല്‍ നടന്ന ഈ പ്രദേശത്തല്ല ചൈന പതാക ഉയര്‍ത്തിയത് എന്ന് ഉറവിടങ്ങള്‍ പറയുന്നു.
Facebook
Twitter
